حَرْكُو وْتْحرْكُو….تصَوّرْ راسك أحمق… فْ شجرة السحابْ

*****

 حروف إلهام

….

achta ta ta ta

 حروف  وصوت إلهام

***

 http://R255682.copyrightfrance.com

******

 

أشْتا تاتا تاتا

أشتا تاتا تاتا

بْشْوِيّة أوتْباتا

نْطَلْبو الله الإغاثة

أشتا تاتا تاتا

أصُبِّي صُبِّي صُبِّي

الزّريعة في قُبِّي

مْن الجفافْ نَجِّينا

أولْمْاء أْسْقينا

الخيرْ أعْطينا

ياربِّي نجِّينا

لْ الطْريقْ اهْدينا

لأوْلادْنا خلِّينا

بالإيمانْ غْنينا

بالقناعة زكِّينا

أشتا تاتا تاتا

بْشْوِيّة أوتْباتا

نْطَلْبو الله الإغاثة

يا لطيف…يا لطيفْ…أو يا لطيفْ

ألطُفْ بينا من حر الصيفْ

بْغِينا شْتانا تْرجعْ بعد الخريفْ

أو يرجعْ هوانا رطبْ أو نظيفْ

بحال جبال الأطلس أو الريف

يا لطيف…يا لطيفْ..أو يا لطيفْ

 http://R255682.copyrightfrance.com

 boussafa charifa2008

أشتا تا تا،من ذكريات الماضي الجميل

الطفولة بكل معانيها

غَيَّرْتْها أتمنى أن  التغيير يعجبكُم

كانت إلى تْعَقْلُوا

أشتا تا تا آوْلاد الحْراثا

آصبي صبي صبي

آولادك في قبي

هاد الشي علاش بقيت عاقلة

 http://R255682.copyrightfrance.com 

******

 

الجفاف من الإنسان 

 

السْمَا من جَهْل الإنسان نْشْفُوا دموعها

والأرض من الطُّغْيان تْهَرْسُوا ضْلُوعْها

مابْقاتْ حتى قَطْرَة من الشْتا تَرْوِي جُوعْها

زادْتْ نْشْفْتْها الشمس من كثرة طْلوعْها

السما عْياتْ بْرِيحْها تْحَرَّكْ سْحابْها

يْمْكْنْ تْرْجَعْ الشْتا الحْنينة من غْيابْها

ماْلقاتْ غيرْ البْرد القارس يعانْق ضْبابْها

بحُكٌرَة الإنسان الأرض رْشاوْا كْتافْها

مْشى خيرْها من كثرة جفافْها

ضاعْتْ الدْخيرة أو طاحو سْوالْفْها

فارْقْتْ الخَيْراتْ والأَوْراقْ فْرُوعْها

خَرَّبْها الإنسان واليوم يْبْكي رْجُوعها

سْقاها بالوسخ أو لَبَّسْها الغاز أو الدخان

آش كايْجِي ياناس فْ الراس من بعد الصِّيبانْ

boussafa charifa ilham28/02/2008

****

بالعفيون

*******

بالعفيون بْنا حياتُو

أو ريَّبْ شْلاّ عقُولْ

بالعفيون جْبْرْ ذاتُو

أو خبّلْ ذاتْ الكُونْ

بالعفيون لْمْعفّنْ

عفّنْ أو خرّبْ العقُولْ

بالعفيون لْمْعفّنْ

ما هْمُّو إيكون مدلول

جالس أو ناعس عليه

أو وْلادنا إيعُوموا فيه

مشاوْا ولادنا فْ دارْ غفلُون

ها المْلْيوحْ…

ها المجنونْ

****

 13/07/2008إلهام

7argou wet 7argou

حَرْكُوا وْتْحرْكُوا

**

لا تْمْحَّن راسْكْ آبُويا

راهُمْ غادْيِينْ

يْتْسابْقُوا عَلْ الدْنْيا

حْسَابْلْهُمْ دايْمِينْ

راهُمْ دايْخِينْ

فْ دوامة الدنيا

لاتْشْقِّي راسْكْ آبُويا

مْعامْنْ تْهْضْرْ

مْعَ اللِّي يْغْدْرْ

اللِّي بْ خوهْ يْفْطَرْ

وْشْكُونْ تْوَصِّي

وْشْكُونْ إي رَصِّي

راهُمْ مْشاوْا آبُويا

غِيرْ تْهْنَّى

عْطاوْنا بْالكْفى آبويا

عُمركْ ماتتهنَّى

عْطاوْا وْجُوهْهُمْ للضْواوْا

الفَّامْهُمْ مَحْلُولة

وْلادْنا آبُويا مْشاوْا

شَبْعُوا من البزُّولة

على بْلادهم تْخْلاَّوْا

طَمْعاتْهُمْ المهبُولة

بْقْشاوْشْ العصر تْغْواوْا

حَرْكُوا وْتْحرْكُوا أو حَرْكُو قْلُوبْنا

وألْحَرّاكة حَرْكُو وْلادْنا وْجْيُوبْنا

 

ضاعُوا وْلادْنا

إيحْلْمُوا بْ بْرَّا

وْقْشاوْشْ بْرَّا

حتى ماتُوا بْرَّا

الله يْنْعلْها جَرَّا

الفْلايْكْ آبُويا كِ المْغارْفْ

تْعَمَّرْ أو تْخْوِي للبحر وْالحُوتْ

لْ وْلادْنا اللِّي ضَحَّاوْا عل القُوتْ

  حَرْكُوا وْتْحرْكُوا وْرْشاوْا بالموتْ

حَرْكُوا 

 وْتْحرْكُوا

وألْحَرّاكة حَرْكُو

 25/05/2008

فْ شجرة السحابْ

طَلَّعْتْ عِينِي

فْ اغْصانْ السحابْ

حطِّيتْ عِيني

فَرَّشْتْ لْها

 سَرَّحْتْها

رارِيتْ بْ شْفارْها

حتى غمضت عِينِي

على ظهر السحابْ

رَكَّبْتْ عينِي

حَمَّلْها السحابْ

بْ حمّالو الأبْيضْ

حتى نعْستْ عِينِي

فْ صفحاتْ  السحابْ

قنطت عِينِي

قنطت

من سكَاتهم

من شِيبهم

من كتابْهم الخاوِي

و لا حتْ حروفْها عِينِي

زرعاتها

و نشراتْها

على حبل الزمان

بمقابط الشّكل

امقابط من الضَّمّة

 الكسرة….

والفتحة…

امقابطْ اتْغيَّرْ المعْنى

بحالْ الظُّرُوفْ

 انْشرتْ حْروفِي الفازْكْة

اللِّي تقطرْ…

 طر….طر…

حروفْ تقطر

من بكى الأيام

واللاَّ السحابْ

سطح عِينِي

ننشرْ فِيه حرُوفِي

مصبْنَه بْ صابُونْ الدوَامْ

صابُونْ الهَمْ

بْ طابعْ حُرْ

إسمُو الآلامْ

مَفْرُوكة فْ جفْنة ذاتِي

 على فرَّاكة حياتِي

 25/05/2008