• Accueil
  • > مسرحية فَرْدِيَّة … العيشة فْ بْلاد بْرَّا

مسرحية فَرْدِيَّة … العيشة فْ بْلاد بْرَّا

مسرحية فردية..بالعامية المغربية…العيشة فْ بلاد برّا

 تَحْكِي الحياة في فرنسا

الغُربة….بِوَزْنِها الثقيلْ

من تأليف إلهام شريفة بُصفا

العيشة فْ بْلاد بْرَّا

مسرحية فردية تقوم بتمثيلها إمرأة أنيقة…خفيفة


مللي كنت كانكتب المسرحية تخايلت زوج ديال الفنانات

خديجة أسد و نزهة الركراكي…ربما لأني بغيت شي أدوار تقوم بهم خديجة

أو أدوار أخرى نزهة…

وحدة كا تكمّل وحدة …لأن خديجة عندها طريقتها و نزهة بطريقتها

*******

بعد رفع الستار…كانشوفوا إمرأة محترمة..أنيقة

 

كاتقرّبْ من الجمهور و تخاطبه

أهلا وسهلا بكل الزوار الكرام

…دَخْلُوا وْ تْفَضْلُوا مرحبا….

ما تْبْقاوْشْ  حْدَا البابْ…

حْنَا مغاربة…أو معروفين بالكرمْ

أو كاتْجِينا النَّفْسْ عْلى بَعْضِيَّاتْنا….

واخَّ فينا النَّفْخة…أو ماكانْرْضاوْشْ

ديما هازِّينْ راسنا الفوقْ…

أو اللِّي سَوَّلْنا عْلى حالنْا…

…كان جاوبوه..

..الحمد لله….

..إلى سولوك فين غْبْرْتِي؟

إوا غيرْ فْ الدنيا…

جري من هنا..جري من لْهيه..

أو حْنا يْمكن كُنَّا غيرْ حْدَا التّلْفَ.. زَة

وْلا فْ الأنْتِيرْنِيتْ…

وْلاَّ الخْدَّامة هْرْباتْ

وْحْنا شَادِّينْ بْلاصْتْها فْ التْجْفافْ…وْالخْروقْ

وْالله تادْخْلُوا باشْ كايْحَلْفُوا العْياَلاتْ

أو راكْم عارْفِين العْيالاتْ إلى حلفوا

ما يْمْشِيوْا حتى  إي نَدْمُوكُمْ

.ياالله مانهضروش حْدا البابْ..

مالكم مَخْلُوعِينْ مْنِّي؟

….

خلاص …بلاما نجُركمْ

 

راني عارفكم باغين الدّخْلُوا….دايْرينْ زعما النِّيفْ

بغيتُوني نجرْكمْ….باش الدّخلوا بالعزْ

 

أشنُو زعما  حتى نحلفْ….؟

والله تَ الدُخلُوا..

لا… حنا المغاربة كانْضيْعُوا نص فْ حياتْنا  غيرْ فْ حلف علي نحلف عليك

أمّا حلفْ فيّ نحلفْ فيكْ…حياتْنا كلها فيها ضاعتْ

واشْ آعِبادْ الله…كا تْلْقى بنادم معروض للعرس….

عوّال يْشطحْ…شحال أو هو يْدّرّبْ حدا المرايا

إلى كانت مرا تكون هرساتْ البستيلية بْ الشطيحْ

أو جايْبا معاها للعرسْ زيف صحيح باشْ تشطحْ

تلقاها …هاهي كاتْ صفّقْ…هاهي بدات تشيّرْ بدِّيها

شويّا شوارْبها كايْ غنِّيوْا مع الجوقْ….

إلى عندها شي شعر مسرّحْ…ها هي بدات تتحيّر

كاتْجِي نت كا تقولْ النّوْضْها مسكينة تبرّدْ الغدايْدْ

السّاعا كاتْقولْ…لاّ..لاّ..بغيتي الناس إي ضحكوا عليّ

ونت كاتقول لاواه علاش غَ يْضحكُوا عليكْ ..حاشا

وْهي لا..لا..وِيلي..ويلي..عفاكْ ما تْجرْنيشْ

****

ها الوقت ضاعْ

فْ جُرْني نجُرّكْ…

حتى كاي واللِّيوْا كاعْ الناس كايْرغبُوا….

وي قولوا حشوما نوضي شوفي الراجل مسكين من الصباح أو هو يْجُركْ

إيوا والله حتى تنوضي

الغزالة كاتْجاوبهم ومللِّي حلفتُوا عليّ مانْخلِّيكُمش تصوموا

زعما بقاوْا فيها…. باش مايصوموش ناضْتْ…ها الكذوب

 

هما حلفوا بلْعاني عارفِينها باغا الرغيبْ أو الحْزارا

 

عارفين بللي غير غادي إحلفُوا  وْ تنوض لالاّ

واجّا ما كلسْها 

العرس كاتلقى شي جر شي

شي يحلف على شي

لاواه…شي يحلف ف شي ماشي ف العرس

هاذيكْ حتى كايْ فوتْ العرس…بلاما نذخلوا فْ الدِّيطايْ

حياتنا مشاتْ غير فْ حلف عليّ نحلفْ عليكْ

واشْ آ عباد الله جَ الإنسان فْ وقت الغْدا واللاّ غالبا مع ١١ واش هذ الساعة هي

ديال الزيارة؟

علاش اللي مايْجِيجشْ مع ٣ أوْ ٤ وِ شرب معاك قهوة

لاّ ..جَ هو فْ ١١ أو يْقولْ أنا كنت غير دايْزْ من هنا أو قلت نجي نشوفكم

وْنتَ تقوليه والله حتى تجلس تتغدّا معانا

أو هو زعما مطوّرْ كايْجاوْبْ…مانبغيكشْ تصوم ثلت أيام على وْدِّي

هايْ…هايْ…ما مطوّرْ غِ هو

أو مللِّي كاتْحطْ الماكلة كايْديرْ راسُو شبعان

وْنتْ مسكينْ كاتقوليه…كول…كول..

يا كما…مسوس .. واللاّ مالحْ

أو هو… لالا الله يعطيك الصحة راني فاطر معطّلْ

أو جيتْ بلا عراضة سمحولي ماحسابنيشْ غَ نجِي مع الغدا كدْ كدْ

****
ونت عرقان أو ما واكلشْ فْ خاطرك..كاتقول والله ت تاكل  

يا كما بغيتيني نصوم ثلت أيام 

لاواه ناكل باش ما تصومشْ

آه…آه….آه… 

 

كيفاش بغيتونا نتقدْموا ؟….نهضروا على مواضيع مهمة

 

نشطحوا فْ خاطرنا بلاما نوْضوا حدْ

حنا غير والله ت تاكل والله ت تشرب و الله ت تبات

شوفوا الناس ديال أوروبا ماعندهومشْ ها دْشي

أنا واحدْ نهار جاوْا عندي أصدقاء فرنسيين أو كانتْ عندي

المِّيمة جات من المغرب…حطِيتْ لْعشا …كلينا….ضحكنا

أو راكم عارفين هما إلى جمعوا يْدِّيهم….غير جمع الطّبلة ديالكْ

ماما تقلْقاتْ منِّي

 أو قالتْ ماحشمتيشْ آ إلهام تجمعي الطبلة

جاوبتها …ماما صافي الناس كلاوْا أو شبعوا

قالت مسكينة الله إيطوّلْ عمرها…هادْشي اللي ربِّيتكْ عليه

أنت بنت الدار الكبيرة…الباك وانا ديما نحلفوا عل الإنسان با ش ياكل

اللي ذاخل واكل واللي خارج واكل

جاوبتها…وا ماما

هادْ الشِّي ماكايْنشْ هنا …اللي ذاخل ياكل…واللي خارجْ واكل

هاد الناس عندهم نيشان نيشان

مايْ جِيوْكْش فْ وقت الغدا..وْ نهار إلى بغاوْا إيشفوكْ هما كايْعرضُوا عليكْ

تشربي كاس دْ القهوة فقط

وِلى مشاوْا حتى عرضوا عليك للعشا….هايْ..هايْ ..

عرفي باللي درسوها مزيان أو كتبوها فْ اليومية

عنداك أماما راهم عارضين علينا الشهر الجايْ…يا إمّا شبعي فْ الدّار عاد نمشيوْا

يا إمّا كولي حتى تشبعي عنداك يْحسابْ لك أماما غادي يْحلفُوا عليك

مسكينة ماما بغاتْني نحلف على النصارى باش ياكلوا
 

إيييييه….الله يسمح لنا من حقهمْ

مللي جاتْ مسكينة عندي وانا مللي نفيقْ وانا نحلف عليها

ماما كولي…عافاكْ آماما…غير هذْ الفريمِيجَة

أ و هي ….لا بنتي يْخلف عليكْ…شبعتْ

وانا والله آماما حتى تاكلي 

أوهي…آه…آه…تمشي تصومي ثلت إيام على ودِّي لا لا

 

غير خلِّيوْها علْ الله

 

خاصني نعلّمْ النصارى من دابا ندرّبْهُمْ باش يْتعلْمُوا يْحلْفُوا

 

مللي غادي نمشيوْا لعندهم الشهر الجّايْ

أنا ما نبغيشْ تبقى ماما بالجوع…والله م حلفُوا عليها لا كلاتْ

إلهام تنظر إلى الجمهور وتخاطبه

شفتكم حالِّين الفّامكم بحال إلى تقول كا نهضر بلغة  أخرى

زعما نتُوما ماشي من هاذ النوع….

واللاّ زعما نسيتوا….آ….فهمتْ….نتوما فاكانْسْ من الخارج

ما بقيتوشْ عاقلين على العاداتْ ديال حلف علي نحلف عليك

إلى كنتُوا من الخارج حتى أنا هاذي ٢٠ سنة وانا في باريس

و حتى حاجا ما نْسيتْها…وْتكولْ فرتوتة صغيورة

أنا راني مازالة هي أنا….حتى التبركيك مازال فيّ

مرة مرة  كاتْجِيني النغزة غير خلِّيوها على الله 

 هْناَ فْ هذْ البلاد السعيدة ماتْقْدرشْ تْبْرْكْكْ


أو شكون خلاَّكْ؟


الله يْحْفْظْ الناس ك الطيرْ….

أو حتى  أنا وْاللِّيتْ نْطيرْ…

واخا كانْخْرْجْ زعما نْفَوَّجْ..

ك نْلْقى راسي كانْجْري..أو نْوْلِّي سخْفانة..

آه..آه…على بْلاد ..

كانْبغِي غ نسرقْ شي تْبَرْكِيكْة نْدَوَّزْ بيها النهار

واخا ماكا نْلْقى لْمْنْ نْعاوْدْها..المهم نْبْرْكْكْ

الساعة الناس مشْغُولين بْ مستَقْبَلْهم…

أو مستقبل وْلادْهم..التْبَركِيكْ ديالهمْ…

 إيه…كْيْتْنا حْنا

التبركِيكْ عندهم فْ المطالعة..القْراية

…فْ الطُّوبيسْ كايْقْراوْا

..فْ المِيتْرُو كايْقْراوْا

…هذك السْبْرْدِيلا نايْكْ اللي نت لابْسْ

 واخا تْرْكْزْ  بيها ..ماشي مهمة عندهمْ

المهم عَنْدهم هو الأخلاق..

كِيفاشْ كاتْهضْرْ..

 حتى وْلِيداتْهُمْ صْغِيوْرين كايْقْراوْا

حْنا وْلادْنا كانْعلْمُهم الحْرْفة من الصغُرْ

سِيرْ آوْلِيدي دْخْلْ لْعَنْدْ الجارة حثى الكُوزِينة

أوحَنْزْزْ مْزْيانْ آشْ دايْرة لْغْدَا…

رانِي عْيِيتْ مانْشْمْشْمْ..

الريحة هذ النهارْ ماشْمِيتْهاشْ

هذي يْمكن غادِي تْسَخَّنْ الشْياطة دْ البارحْ

وْلاَّ سيرْ لْعَنْدْ مْراتْ المْعْطِي…أو قُولْها ماما بْغاتْ َبصْلَة

بْغِيتْكْ تْجِيبْ لِي خْبارْ النَّاسْ اللِّي جاوْا لْعَنْدْهُمْ…

ياكْمَا جاوْا إيخَطْبُوا زُبِيدة…يالاَّهْ سيرْ

المهم..مللِّي كا نْقْنْطْ كانحُلْ الشَّرْجْمْ وْاللاَّ البابْ

واخا الناس طايرة ماعْلِيهشْ نْبْرَّدْ التْبَرْكْيكْة..

غِيرْ كانْطُلْ مْنْ الشَّرْجْمْ وْلاّ البابْ

كانْلْقى راسِي خْرْجْتْ من الخَريطة ديالْ فرنْسا

كانْوْلِّي فْ الهند..الصين..آفريقيا..

غيرْ من الطَّلة

فرنسا حسن عوانْها شحال من حْمْلْ هازَّا

جاري عل اليمين.. البُّولُونِي

!عل الشمال بَرْطْقِيزي

!أو قْبالْتي بُوصْنِياكْ.

أو حْدا البْرْطْقِيزِي.. هِنْدِي

الكرة الأرْضية هذي ماشي خريطة فرنسا

نْهارْ الأحد كولشي طالق الموسيقى ديال بلادو

تْخايْلُوا معايا الفقصة

كانكون كانْغَنِّي مع المرحومة الوالدة كلثوم

واللاَّ ماما كلثومياظَالِمْنِي

مالْكُمْ كا الضَّحْكُوا …

الشرق كايْ كْولُوا أم كلثومْ

حنا هنا فْ المغربْ خاصنا نْعَيْطُو لها

الوالدة كلثوم…ماما كلثوم

ولاَّ مِّي كلثوم….

أو مالكُم ماعَمَّرْكُمْ سْمَعْتُوا بْ مِّي كلثوم؟

أنا كانْعْرفْ واحدْ البْنِيَّة مْللِّي تْزْادْتْ…

أو هما عليها مِّي كلثوم..مِّي كلثوم

مسكينة ماتْزْوْجاتْشْ

اللِّي كايْجِي يْخْطْبْها…

كايْسْمعهم كايعيطُوا عليها مِّي كلثوم

كايْهْرُبْ..كايْحْسابْلُو وَالْدَة داكْ القَوْمْ كاملْ

تْحْرْماتْ مْنْ الزْواجْ  حِيتْ  سْمِيتْها أُمِّي كَلْثُومْ 

المهم….

كانكون كانْغَنِّي مع المرحومة الوالدة كلثوم

الموسيقى مخلطة ديال الجيران من جميع أقطار العالم

 يا ظلمني..ك تخلّطْ مع الموسيقى الهندية

ونولِّي ك نغنِّي

 يا ظلمني زِنْدِكِي هارْكضمْ إكْ نَيِي جنكْلْ هِي أو ألبِي من رضاكْ محروم

كون كانت الوالدة  كلثوم عايشة كونْ دْعاتْنِي

وانا كْالسة فْ الجَّرْدة ديالِي

حْثى كانْ وْاللِّي كانْتْكَرْكبْ فْ الربيعْ….

 كايْحْسابْني راجْلِي تاهُوَ غادي يْتْكركْبْ

 بحال الأفلام الهندية الساعة كانْسَمْعُو كايْغَوَّتْ

 راكُمْ عارْفِينْ المغاربة

لامْشاوْ ا حتى  غضْبُوا …غير الله يْحفظْ…  

  حْنَا المْغاربة واخَّا كانْكُونُوا كانْهْضْروا عادِي

الآجانبْ كايْحْسابْلْهُمْ كانْدَّابْزُوا….

إلى سْمْعْتِي شِي واحْدْ فينا كايْهْضْرْ بْشْوِيَّ

هذاكْ حْضِي راسْكْ مْنُّو…عَرْفُو بْللِّي طالْقْ وْدْنُو للْتْبَرْكْيكْ ….

 ….

المهم راجْلِي كانْسْمعُو كايْغَوَّتْ

كا يْقولْ: واشْ تْمْسْحاتْ لْكْ النُّقْطة ياهذْ المْرا؟

ماشي النقطة دْ لْهْنُودْ آ لْمْرا..آ النقطة ديال العقل؟

آدوزِي عْطينا ماناكْلُواوْلادْكْ راهم جاعوا

 حْنا الحنان عندنا الله يحفظ غيرْ فْ المْعْدة

كاتْلْقَى الفرنْسِي مللِّي كايْهْضرْ مع مْراتُو…

تقُولْ أصْدِقاءْ….نْسَمِّيوْها مثلا جاكْلِينْ…

الكتابْ اللِّي قْرِيتُو آزَوْجَتِي العزيزة  جاكْلينْ

عْجْبِي بْزَّافْ…

كاتْجاوْبُو جاكْلِينْ…

أنت دائما الذوقْ ديالِي كايْعَجْبْكْ…شكرا حبِيبي…

كايْجاوْبْها هُوَ…

أنا من النهار اللِّي عْرَفْتْكْ…حبِّيتْكْ أو حَبِّيتْ ذَوْقَكْ

أو حْنا المْغارْبَة…مْللِّي كاالدُّوزْ سبعْ إيامْ دْ البَاكُورْ…

كاتْجِي مَثلاً نوالْ…كاتْقُولْ  لْزَوْجْها هشامْ:

تْبَدَّلْتِي عْلِيَّ يا هشام!!!سبحان الله…

حَطِّيتِي هشام….هزِّيتِي هشامْ

كايْجاوْبْها هشامْ:

سيرِي ياهذْ بْنادْمة وْجْدِي لِينا ماناكْلُوا

أو باركَة عْلِيكْ من الأفلامْ راهُمْ دَوْخُوكْ

كاتْجاوْبُو هي:

هادْشِي ماعَنْدُو حثى علاقة بالأفلام…

حْنا تْزَوَّجْنا باشْ نْعِيشُوا حْياتْنا…

كايْجاوبْها:

غِيرْ قْريتُوا ياهذْ العْيالاتْ وْاللِّيتُوا كاتْفَلْسْفُوا بلا قْياس

سيري لْكُوزِينْتْكْ راه الكَرْشْ بْداتْ كاتْغَنِّي…

وِلا مْشى حْثى بْغى يْشْكُرْ مراتُو بْحال راجلْ جاكْلِينْ

عَرْفْتُو آشْ كايْقُولْ لِيها؟

الطَّاجينْ اللِّي دْرْتِي البارْحْ منْ داكْشِّي…

الله يْعْطِيكْ الصحة…

غْدَّا إنْشاء  الله …نْجِيبْلْكْ الكُورْعِينْ

بْغيتْهُمْ إيباتُو  عَلْ الفاخْرْ…باشْ نْمَتْعُوا بالبْنَّة

شْحالْ هذي ماكْلِيناهُمْ

كاتْجاوْبُو هي

بغِيتِيهُمْ  بالزْرعْ  وْاللاَّ بالحَمَّصْ؟

واشْ عَمَّرْكُمْ  شْفْتُوا راجْلْ معَ مْرْتُو

 كايْ هضْرُوا عْلى أفْلاطونْ وْاللاَّ أرسطُو

وْاللاَّ عُقْدَة أُودِيبْ….؟

يا إمّا مْشِيتْ عَنْدْ فْلانَة…الله يْسْتْرْ حْطَّاتْ لِي واحْدْ

البَغْريرْ صْمَكْ مافِيهْشْ التْقابِي…

وْاللاَّ هذِي عامَيْنْ أو مازالَة مابْدْلاتْشْ الطْلامْطْ

حْثَّى لا خْرْجْنا نْفَوْجُوا عْلى نْهارْ

خاصْنا نْدِّيوْا الماكْلة دْيالْ أُسْبُوعْ

واشْ آعِيبادْ اللهْ…مْشيتْ البحر فْ جنوبْ فرنْسا…

كاتْلْقى النْصَارى كايْتْشَمْسوا …ولاَّ كايْقْراوْا..

ولاّ كايْلَعْبُوا مع وْلادْهم….أو عَنْدْهُمْ واحْدْ الكْلاسِييرْ

صْغِيرة..وْلاَّ صاكْ  فِيه سانْدْويتْشاتْ صْغارْ

فيهُم الفْروماجْ…وْلاَّ بْواطاتْ دْ الطُّونْ

أو باكِيَّة دْيالْ لْكاطُو أو الماء ولاَّ المُوناضا

وْحْنا تْبارْكْ الله…كُلْ واحْدْ فِينا جارْ  صاكْ

جوجْ دْيالْ الكْلاسِييرْ…الطَّبْلة أو لْكْراسا

أو المُوسِيقى مَطْلُوقَة عَلْ الجَّهْدْ…

بْالسِّيفْ على الناس إيسَمْعُوها..

أو غِيرْ كانْكْلْسُوا وْحْنا كانَاكْلُوا

البحر كايْجَوَّعْنا غِيرْ حْنا…النصارى ماكايْجَوَّعْهُمْشْ

النصْرانِية كاتْتْمَتَّعْ بالبحر أو المغربية…

كاتْصاوْبْ الصَّانْدْوِيتْشاتْ…

النهارْ كُلُّو أو هيَّ تْفَرَّقْ فْ الماكْلاَ…

مللِّي كُولْشِي كايْشْبَعْ …كاتْنْعَسْ…

حْتى كايْنَوْضُوها…ماما بْغينا ناكْلُو…

كنتْ  قُلتْ لكم مْللِّي كانْ طُلْ منْ الشَّرْجْمْ

…….

المهمْ

كانْلْقى راسِي خْرْجْتْ من الخريطة دْ فْرانْسا

 

وِلا مْشيتْ كيما كْلتْ لكم طَلِّيتْ من بابْ دارِي

حيثْ هْنا حْدا باب داري إلى دازْ شي واحدْ..كيْ طِيرْ

بْحالْ البرقْوِلا مْشى حْثى شَفْتِي شي واحدْ واقفْ

هذاكْ حاشاكُمْ جابْ الكلب ديالو إيخْوِي مْصارْنُوا

مساكنْ الناس دْيالْ هْنا..

فْ عُوطْ مايْرَبِّيوْا شِي خروف

إيخرْجوه يْرعى أو مللِّي يْسْمانْ إيدَبْحُوهْ..

لا هُما وْالكلابْ

ولا زَغْبْكْ الله أو بْغِيِتي تْهْضرْ شْوِيَّ

الموضوع كُلُّوا عل الكلابْ وْالقطُوطْيا لَطِيفْ..!..

آشْدَّاني نْسَوَّلْ النَّصْرانِيةمَرْضاتْنِي

وْاللِّيتْ مْبْتاسْمة بالسِّيفْ عْلِيَّ..أو سْنانِي تْرْبْطُوا

مْعَ بَعْضِياتْهُمْ…أو هي عْلِيَّ

الكلب ديالي مسكين مابقاش كاياكل مزيان

قاليَ الطبيب ديالو باللي عندو مرض نفساني

وانا كانجاوْبها نْدْمانة علاش صَبَّحْتْ عليها

أو لالا…!مسكين

.فيَّ الفقصة أو البْكْيَة

أولالا …!مسكين

حِيثْ أُمُّو ماتْتْ أو قُلْتْها لُو مسكِينْ

جاوْ بْتْها أنا اللِّي خاصْنِي لْعْصا

ماكانْش عْلِيكْ تْقُوِليها لُو

أو زْغْبْنِي الله مللِّي كْلْتْ لِيها

هُوَ غِيرْ كلبْ

جاوْباتْنِي غَضْبانَة….

هذا وْلْدِي ماشي كلبْ ….أو هو حْسْنْ من بْنادمْ

مللِّي كانْهْضْرْ مْعاهْ كايْتْسَنَّتْ لِيَّ ماشِي بْحالْ بْنادْمْ

وِلا خْرْجْتْ بْلاما نْدِّيهْ مْعايا كايْبْكِي عْلِيَّ

كونْ كانْ بْنادْمْ كونْ يْفْرْحْ إلى خْرْجْتْ أو خْويتْ لو الدار

زْغْبْنِي الله وانا نقُولْ

آشنو قالك الطبيب عندو

جاوباتني:

الطبيب النفساني ديالو قالي

بللِّي وْلْدِي حزينْخاصْنِي نْهْضْرْ معاهْ غيرْ بْشِوِيَّ

عَلى ماماه، أو نْعَلْمُو بْللِّي الموتْ عْلينا حق. ..

واحدْ الوْقِيتَا بْداتْ الغْدايْدْ كا تْطْلْعْ أو الفْقْصة حثى هي

أو بْديتْ كانْحُكْ….أو من تْمَّ وْلاَّتْ فِيَّ الحَساسِيَّة

أو زْغْبْنِي الله عاوْدْولكن نْسْتاهْلْ ….

جايْبَة الصْوابْ ديالْ المغربْ…..

وانا نْقولْ:عْلاشْ ماتْدِّيهشْ للمغْربْ..الشمس مزيانة

للحزنوْلْهوا غادِي إيعجْبُو الحال إيتْعرَّفْ

 على الكلابْ دْيالْناغادي إيشوف واقع ديال الكلابْ

. ..ماغايْبْقاشْ فيه الحُزْنْ على مُّو. ..

غادي إيوْلِّي فيه الحُزْنْ ديالْ الكلابْ ديالْنا

غادي يْدِيرْ السْطاجْ وِ وْللِّي كْلْبْكْ..عَفْواً مادامْ..

إي وْاللِّي وْلْدْكْ راجْلْ ديالْ الزْمانْ…..

 بْعْدا يْعَلْمُوهْ الكلابْ ديالنا النَّبْحَة على حْقْها أو طْريقْها

باش القْطُوطْ إيخافُو مْنُّو…وِدِيرُوا بْحْسابُو..

04.jpg

وِ يْحْضي لِكْ الدَّارْ….

أو لْماكْلا …غادِي إيولِّي ياكُلْ من داكْ الشِّي

واه كَلْبْها مابْغاشْ ياكُلْ اللحمْ….فينْ عَمَّرْكُمْ سْمَعْتُوها؟

حْنا كْلابْنا إلى بْغِينا نْتْهْلاَّوْا فيهُمْ كانْعْطِيوْهُمْ عْظمْ مَغسولْ

من  اللحمْ أو مْنَشَّشْ مْزْيانْ…

حيثْ حنا العْظامْ ماكانْلُوحُهُمْشْ…كانْدِيرُوهُمْ  فْ الحريرة

قالْتْ الكلبْ عَنْدُو مرضْ نَفْسانِي…

الشَّبْعة  أو ما الدِّيرْ…حْنا كْلابْنا مْساكنْ كايطُلْبُوا غِيرْ السْلاكْ

الحاصُولْ آ الخُّوتِي…

العِيشة  فْ بْلادْ بْرَّا لَهلا يْعْطِيها لْ شي مسلمْ

حيثْ شي ماكايْعْرفْ شِي…

شْحالْ من واحْدْ ماتْ فْ دارُو…كايْبْقى حثى كايْخْنازْ

عاد كايْدَفْنُوه. …

فْ بْلادْنا واخَّا فينا التْبرْكِيكْ…أو شي كايْهْضرْ فْ شِي

الحمد لله كانْطِيروا إلى سْمَعْنا شي واحدْ مريضْ…

ماعَمَّرْ شي مْسكِينْ ماتْ بالجُّوعْ…

وِلا سْمَعْنا شي واحْدْ كايْمُوتْ..

كانْتْجْمْعُوا عْلِيهْ أو نْبْكِيوْا حْثَّى كايْنُوضْ من الفْراشْ

كايْزاوْكْ…

ها العارْ خَلِّيوْنِي نْمُوتْ فْ خاطْري..خْرْجُوا علِيَّ…

أو كايْنُوضْ لْمْراتُو

..أو كايْشَبَّعْها مْعْيارْ…

ياكْ آ بْنادْمة…باغا تْهْنَّايْ مْنِّي…دْغْيا جْمْعْتِي الجُّوقا

دِيما جامْعَة عْلِيَّ بْنادْمْ…خَلِّينِي نْوَدَّعْ الدنيا بوحْدِي

أو مللِّي نْمُوتْ آرا ماعَنْدْكْ

حْنا أهلْ الكرمْ وْ الجودْ…

واخَّا كانْهضْرُوا فْ بَعْضِيَّاتْنا

مانْدُوزُوشْ بَعْضِيَّاتْنا

مازالة القصة طويلة

شْلاَّ ميْتْقَالْ فْ بلاد بَرَّا….


r25568217.gifboussafa charifa ilham22/04/2008

http://R255682.copyrightfrance.com » target= »_blank »> CopyrightFrance.com


11 Réponses à “مسرحية فَرْدِيَّة … العيشة فْ بْلاد بْرَّا”

  1. hamid dit :

    tbarek llah 3lik a khti charifa……
    had almasra7iya o 7etta almasra7iya m9alla9 men 3and llah ….rraw3a!!!…..rraw3a!!!
    macha a llah….ila kanet hadi awwal mo7awala 3andek …tbarek llah o khlass..
    amma il stamerriti fel al kitaba…ropama ghadi t9otlina b’dda7k….
    ana ba3da tfarga3t b’dda7k…o s7abi kolhome 3jbouhome…..
    li annaki hdarti 3la al wa9i3 b wa7ed attari9a fanniya….
    ila chafnahome 3la khachabate almasra7 …..waw!!!!
    tbarek llah 3lik …ach3arek….al 7ikam al masra7…super….super…
    zidina…a khti charifa….raki najma…..
    incha a llah ghadi tsat3i f 3alam al fane….

  2. Paon dit :

    hhhhhhhhhhhhhhhhh
    Kat3ajbini f wahed haja kat3alji lmawadi3 li katba b khifa kan waliw blaset manbkiw kan da7ko .
    nsit magoltch lik bse7a lapasti site dyalek lkostim ja zwin

  3. saad dit :

    wawwwww!!!
    wwwawwww!!
    derratni kerchi be dda7k….

    had chi 3andek wawww!
    rani t9adaw li ….khok tta3bir tlefli
    merci charifa

  4. Anonyme dit :

    bonjour
    vraiment c extraordinaire bonne chance

  5. omar dit :

    lam yatim ta9sim al adwar almrjou ta9sim al adwar fa hya masrahia jamila

  6. www.peace9.unblog.fr dit :

    تبارك الله عليك على هاد المدونة الزوينة أ للا إلهام صراحة عجبني هادشي لي دايرا مغربية أصيلة, جبدتي نقطة ممهمة لي حنا متانسوقوش ليها ولي هي الدارجة المغربية نتمنى تزيدينا شويا من هاد التحف لي دايرا
    peace9.unblog.fr

  7. rachida 14 dit :

    salam akhti tbarkalah 3lik lah i3tik sa7a momkin t3araf 3lik ktar

  8. ilham dit :

    bonsoir, c’est vraimant super rigolant, je me prenomme aussi ILHAM o yarit lokan kan 3andi had l ilham dyalek ( inspiration )

  9. hana dit :

    sSUPER KHTI LAH YA3TIK SAHA . LWA9I3 HOWA HADA? WALAKIN HAMDOLAH FAWAJTI 3LINA

  10. Anonyme dit :

    تبرك الله عليك ا ختي الهام هد المسرحية فرحتني وهي احسن مسرحية كنقرى
    وكنتمنى تبقي مستمرى فهد لفكرة
    وبغيتك تديري شي وحدى خرى بحالها
    ويبقوى ليك افكر بحال هاك
    وشكراااااااااااااااااا

  11. mehdi dit :

    ممكن نعرف ديالمن هاد نص المسرحي الفردي حيت عجبني أو باغي نلاعبو

Laisser un commentaire

 

cornillonchristophe |
Les Livres de Loïc ! |
UN PEU DE POESIE |
Unblog.fr | Créer un blog | Annuaire | Signaler un abus | Franck Bellucci
| Les maux du coeur
| Mes mots...