• Accueil
  • > الصُّحبه حدها الفايسبوك

الصُّحبه حدها الفايسبوك

الصُّحبه حدها الفايسبوك

 

كانتمنى هذ المونولوك يعجبكم

كتبني غير اليوم 15/04/2011

…..

على صبعان رجلي  امشت بشويه

كيف امشاوْا صحابي على صبعان رجليهم

اللي كانوا أكثر من صبعان يدّي

ملّي جيت نحسب…لقيت غير صبعان يدّي

قلت مع راسي…ياكما ما بقيتش نعرف نحسب…؟َ

واللاّ ياكما صبعاني اتزادوا…حيت الزيادة من راس لَحمق

حكّيت كُنّتْ راسي و قلت…ياك كلشي اتزاد

 

أنا بنفسي كل نهار كانتزاد…كل مرة ف شكل…لَمرايا ما بقاتش تعرفني

غير كاندوز احداها كا تحدر راسها…كا تدير راسها كا تجفّف

واللاّ كا تسيري صبّاطها…ويلا قرّبت منها و سوّلتها..كاتخرّج عينيها فيَ

كا نقول ليها…شوفي فيَ شي شوفة حنينة..أنا راني المعطي اللي كان بلا لَحية

حيت كل نهار كانتزاد…و كلشي كايتزاد و قلت آجي نزيد اللحية

يمكن اللي شافني اليوم ما يبقاش عاقل آش درت البارح

الجنون اللي فيَ اتزادوا…اليوم تزاد فيَ واحد الجن بلا وذنين

قال…ما ابغ يسمع لحد…باغي غير يتسنّط لعظامو

قال…الهضرة اللّي سمعوها اللّولين ما قتلتش ميكروب الجوع و قلة الشي

 

المهم آ لالّه لَمرايا أنا هو المعطي اللي كان كل نهار بوجه

و كانت قشابتو واسعة…حتى ارجع مسكون و عظامو ديما شادّينو

آه ياكما ما عجبوكش رجلي حيت واللّيت كانلبس غير فردة وحدة…!! قلت مع راسي

رجل حفيانة احسن من زوج رجلين…ملّي تتقطّع هذي نلبس الأخرى

 

و بيني و بينك آ لَمرايا إيلا مرضت لي رجل و تقطعات أحسن

حيت أنا رجليَ بزوج صحاح ملّي كا نقول للناس أنا معدور ماكايتيْقُونيش

كايقولوا…آوْ…!!!زوج رجلين و معدور…اضحك على راسك

 

عييت نقول…وا عباد الله أنا معدور عن العمل حيت الشواهد  ماصالحة لوالو

ويلا تقطعت لي رجل ما نحتاج نقول…وا عباد الله أنا معدور عن العمل ..

….

 

ياه…هههههه كنت كانهدر مع راسي و صدقت كانهدر مع مراية راسي هههههه

شفتو الزيادة فين وصلتني…؟َ

نرجع للهضرة اللي ابديت منها و مانبقاش انْزيد فيها لا تتزاد ليَ شي حدبّه ف الظهر

 

قلت…على صبعان رجلي  امشت بشويه

كيف امشاوْا صحابي على صبعان رجليهم

اللي كانوا أكثر من صبعان يدّي

ملّي جيت نحسب…لقيت غير صبعان يدّي

قلت مع راسي…ياكما ما بقيتش نعرف نحسب…؟َ

واللاّ ياكما صبعاني اتزادوا…حيت الزيادة من راس لَحمق

حكّيت كُنّتْ راسي و قلت…ياك كلشي اتزاد

غير اصحاب اللي كاينقصوا من لَحساب

و اللاّوْا مخلوعين و كل واحد ورا باب

الحضارة اعطاتنا و واللّينا نجريوْا بلا احساب

كون ابقينا كيف كنّا ما يتبدلوا اسناننا بانياب

ابغينا الحضارة و اللّي ابْغيناه أكثر …هم لحباب

 

سامحوني يا ريوسي انضرّق زلافتي من احداكم نمشي للفايسبوك انعزي

شي صديق ماتت ليه أمُّو…و نبعث لواحد شي ورد من ورد الفايسبوك

فابور بلا ريال بلا زوج…ههه وبلا ريحة

و هذ الصديق ما كايعرفني ماكانعرفو و تشوف حلاوة لكلام

كون كان احدايا و الله ما نقول ليه ديك الهضرة

يا الله آ توت ….نمشي نحذف شي اصحاب و نزيد وحدين أخرين 

حيت الصحبة حدّها الفايسبوك

إلهام بُصَفا

 

2 Réponses à “الصُّحبه حدها الفايسبوك”

  1. Motassim dit :

    Yasalam 3ala l5ayal lwasi3

  2. https://vacancesiledefrance.wordpress.com dit :

    Texte intelligent. Je suis tombé par hasard sur ce blog et vais continuer à le lire !

    https://vacancesiledefrance.wordpress.com

Laisser un commentaire

 

cornillonchristophe |
Les Livres de Loïc ! |
UN PEU DE POESIE |
Unblog.fr | Créer un blog | Annuaire | Signaler un abus | Franck Bellucci
| Les maux du coeur
| Mes mots...