• Accueil
  • > الرجوع إلى الرأس(-..-) أ

الرجوع إلى الرأس(-..-) أ

الرجوع إلى الرأس(-..-) أ  

….

شفت فيَ

و ابغيت انْبان عليَ

خنزرت

احكرتني

و قلت لراسي مالك…؟َ

ياك لاباس…!؟َ

و اعلاش كاتْهزْ عليَ

قال…أنا غير مخلوع منك

 ما بقتيش تسول  فيَ

إيلا تهزّيت حيت تفاجأت

من صورتك

اللي واللاّت غريبة عليَ

قلت…عنداك الرمان يتفرقع ليك

واللاّ ضلعة تزاد ليك

و تهرب عليَ

ها وذني منك…! اضْواوْا تجليك

ابقَ يا راسي كيف خلّيتك

و  حتى صباغة ما تطليك

قال…فين  كنت يا راسي من هذي اشحال…؟َ

فين الأحلام اللي امواجها قد لَجبال…؟َ

واش اعقلتي…واللاّ انْعاود الموّال…؟َ

قلت…هذاك  وقت و دابا وقت

 الأحلام مع الوقت تتغيّر

و كل وقت و وقتُو

الأحلام كتبقى أحلام

هي ذاك الضو اللي يشطّب الظلام

بيها راسنا يشوف بعيد

باش يقرّب لذاتو من جديد

 

اعلاش كاتلُوح عليَ هذ الشُّوفات… ؟َ

و اعلاش ف دواخلك عاطيها لَغْوات…؟َ

 

 

 

قلت…حيت عاش كلامي كلُّو اسْكات

و عاش راسي يقلّب على راسو

و مازال نجري انقلّب على الذات

 

 

و انت واش نظرتك تغيرات  للحياة…؟

 ….

 

 

قلت….لازم النظرة تتغير و تجدد لوتاد

 

لازم نشوف فين الصح و العيب

نفهم اعلاش العنب يرجع زبيب

نتعلم

نكبر

و نصغار

و كل يوم  نتزاد

و ما نمشيش مع الواد

 

 

 

 

 

و انت يا راسي اشكون انت ف الريوس…؟

واش الناعس واللاّ الفايق واللاّ المضموس…؟

اللي يقول عندو الزهر واللاّ اللي حكم على راسو منحوس…؟

واش اللي كلامو حلو واللاّ اللي مرّة مالح و مرة مسوس…؟

جاوبوني يا هذ الراس…و بلاما تلعب علي حمادا موووس

 

….

 

 

 

قال…أنا ذاك الراس

اللي يقول إيه لاّ… إيه لاّ

مرة ابْغ لعنب و مرة غير السلّة

مرة يواجه لبحر والأمواج

و مرة ف النخالة ينقبوا  الدجاج

مرة نيفو يتهز ف السما

و مرة يهزُّو الما

 

 

 

أنا ذاك الراس اللي يبحث مازال

ما حدو ف الدنيا تابع المحال

و نهار نلقى راسي يرتاح البال

 

 

 

اشكون أنا…؟

 و اشحال فيَ من أنا…؟

تمّا فين اوحل السؤال

 

….

 

 

 

قلت…سير آ راسي هكذا نبغيك

خارج في جبهة و خارج فيك

انت تقول طابت وانا تحرقت ليك

انت تحبني  وانا نصخط عليك

خليك آ راسي ضدي ما تكونش معايا

واجهني…وبّخني و جرني من سمايا

باش انْفيق و انْعيق  ما نبقاش تحت اغطايا

إلهام بُصَفا و راسها

 

16/04/2011

 

boussafa

 

 

 

Une Réponse à “الرجوع إلى الرأس(-..-) أ”

  1. https://vacancesiledefrance.wordpress.com dit :

    Avis qui amène à la réflexion. J’ai découvert par hasard ce site et vais continuer à le suivre !

    https://vacancesiledefrance.wordpress.com

Laisser un commentaire

 

cornillonchristophe |
Les Livres de Loïc ! |
UN PEU DE POESIE |
Unblog.fr | Créer un blog | Annuaire | Signaler un abus | Franck Bellucci
| Les maux du coeur
| Mes mots...