• Accueil
  • > حديقة العبارات المغربية

حديقة العبارات المغربية

قالوا ….الموت وحدة فْ الدنيا


وِيلاَ قلت لكم بللِّي حنا كل نهار كا نمُوتُوا ماشِي مرة ماشِي زوجْ

 

مللِّي كاتْضربْنا الفِيقة….حتى كانْضربُوها بنعسة….هههههه

 …. ها الدليل

 

 

 

ضْرَبْتْها بْجَرْيَة

***

ضرَبْتْها

ضرَبْتْها بجَرْيَة

ابْقيتْ نضرب نضربْ

حتى اسْخَفْتْ

هربانة من ضريب الصْدَاقْ

و ضريبْ لَكحل فالأبيض

هربانة من العجينة

و ضريبْ الورقة

هربانة من العصا

58585.jpg

و  ضريب الطّر

ضْرَبْتْها

ضرَبْتْها بجَرْيَة

هربانة بحريتي

 من الحقرة

من الخوف

من قلة النعاس

من بوغْطّاطْ

من ضربة الفيقة

هربانة براسي

بعقلي

نتمنى نضربها

نضربها بنعسة

 نغرق

وْ نموت بالنعاس

ضربت الحديد ماحدو صخون

أو عطيتها للهروب

قبل ما نعطيها للبكى

والفرّاكة

5747081.jpg

عطيتْها للجْرِي

عَمّرْتْ عِينِي بْ مُستقبلي

أو كحّلتْ بْلَعمى

من الإستسلام

انْكمّلْ قرايْتِي

عادْ انْكمّلْ ديني

قبل ما يكمّلْ عليّ الجهل

عطيتْها للجْرِي

عطيت لراسي الراحة

ضربْتها بْجرية

بْ حريتي

بْ حقوقي

بْ  أحلامي

بْ قوتي

قبل ما تضربني الجِّيحة

وِ يضربوني الحيوط

وِ يضربوني الجنون

وِ يشدُّونِي عظامي

وِ يطَيحوني

وِ يعْواجْ سعْدِي

وِ يعْطِيوْنِي الناس السْوارْتْ

باش نْفِيقْ من الكلْبة

وِ يتْقادْ سعدي

أنا سْوارتِي فْ عقْلِي

ضربت حسابي

من الضربة الصحيحة

و ضربتها بْجَرية

لراحتي

و راحة بالي

ضربت الخط لذاتي

و ضربت  حسابي

باش… ماناكل جنابي

****

ilham06/09/2008

g388marocessaouira.jpg

***

بالرِّيقْ النَّاشْفْ

رَوَّنْتْ مدينة عقْلِي

فْلِيتْها

قَلَّبْتْ فْ حومة الماضِي

بالرِّيقْ النَّاشْفْ

طْلْقْتْ البرَّاحْ فْ الدرُوبة

حْفرْتْ بْدموعي ثْرابْها

زعْزعتْ اغصانْها

نْبحتْ علْ الموتة دْ الضحْكْ

geloptherapie.jpg

اللِّي قْتْلْنِي بالضحكْ

شحالْ من موتة الضحكْ

ضحْكاتْنِي

fourire.jpg

بْكَّاتْنِي

وْقْتْلاتْنِي

بْغِيتْ نْموتْ

نْموتْ بالضحكْ

اللِّي كانْ يْقْتْلْنِي

حتى كانْمُوتْ بالبكى

763567934552.jpg

خْصارة

مْتْ بالفقْصَة

قْتْلاتْنِي..

مْتْ فْ بْلاصْتِي 

ماتْ قلبِي بالخلْعَة

بالخوفْ..

من موتْ الأيامْ

اللِّي كانتْ تقتلْ بالضحكْ

واللاَّتْ الوقتْ ميْتَة

 

ماشِي بحال ميَّتْ القلبْ

اللِي نفسو ميتَة

الوقتْ ميتَة بلا ضحكْ

ضحكة بْزَّزْ

ضحكة الكدوبْ

 غِيرْ من الفوقْ

 بالألوانْ

ها الصفرة

ها الحمرة

ماتت الأيَّامْ


اللِّي كنتْ نْموتْ فيها بالضحكْ

أو نموتْ عْلِيها

rire.jpg

عْييتْ نْقلبْ فْ الماضِي

حتى نْزْفْتْ

 أو طابُوا رْجْلينْ حْرُوفِي

وْلِّيتْ مْيْتَة بالعْيى

 الدَّاتْنِي عِينِي

غْرْقْتْ..

أو متْ بالنعاسْ

  إلهام 29/05/2008

bebedodoarbre.jpg

 السلام عليكم

 

واش فْ خباركم بْللِّي كاينْ شعْب واحدْ فْ العالم كلُّو عندُو زوجْ ريُوس؟

إوا ماتْسْتغْربُوشْ….هههههه

ها الدليل

 

عندي زُوج ريوس

***

راسْ من هنا

 

أو راسْ من لْهيهْ

راسْ إيقولْ لاّ

أو راسْ إيقولْ إيهْ

راس تابعْ الخوى

أو راسْ كايْ نْهيه

راس حاضي راسُو

أو راس الهوى اللِّي جا يْدِّيهْ

راس  عل المخدّة

والثاني إي فيَّقْ فيه

راس ما فكّرْ فْ غدّا

أو الثاني يْنصح  فيه

حرْتْ مع ريُوسي

واشْ نرتاحْ مع الأوّلْ

واللاّ نْفيق مع اللِّي زعزعْ فيه

قواوْا عليَّ

 

لمنْ نسْمعْ

وْشكون نتبعْ

 

مادْرتْشْ راسي فيهم

خرجت سوقهم

أو ذخلت سوق الزمان

باش نلقى راس واحد

طريق وحدة

راس نهزّوا على كتافي

نْسمع ليه

أو نْدِّيها فيه

باش نلقاه

ملِّي نبْغيه

إلهام 25/05/2008

***

***

مرَّة مرَّة خاصنِي نحْماقْ

باشْ ما نحْماقْ

انْخَرَّجْ عَقْلِي انْهَوِّيه

باشْ ما يخْرجْ عَقْلِي

و ما نخْرجْ عليه

انْخَلْعُو بحْماقْ العصرْ

باشْ ما يتْبْلى بالحماقْ

كانْساريهْ فْ احماقْ النَّاسْ

باشْ ما يطِيحْ أعمى فْ لَحْماقْ

مرَّة مرَّة خاصنِي نحْماقْ

انْسى المعْقُولْ

ندْخلْ فْ المجْهُولْ

نضحكْ معَ اللِّي يضَحْكُوا علِيَّ

واللِّي كانْضْحكْ بْ اهْبالْهُمْ

وسط ضحكة الزمانْ

مرَّة مرَّة كانْسُوطْ بحالْ الِّريحْ فْ راسِي

باشْ مايْسوطْ الرِّيحْ فْ راسِي

كانْخَرَّجْ الفرخْ من القفص

باشْ مايطِيرْ لِي الفَرْخْ

كانْحْماقْ مع حُمَّاقْ الزواقْ

حُمَّاقْ غلافْ الرُّوحْ

حُماق المادة

 مع اللِّي لسانْهمْ طويلْ

على والُو

على الريحْ

كانْحيَّدْ هدَرْتي من الميزانْ

مع اللِّي ماعنْدو ميزان

اللِّي الهدرة عندو عرارْمْ

نبْقى غادا جايَّا فْ الهدرة

مع اللِّي يدخلْ وِ يخرجْ فيها

قافْزة مع اللِّي يخرجْ من القفص

امْجَبْدة مع اللِّي لسانُو امْجَبَّدْ

ماضية مع اللِّي لسانو ماضِي

حاضية جنابِي

باشْ ما نخْرجْ من الجنْبْ

 و مانْولِّي امْجَنْبَة

 ilham08/06/2008

  

 

***

***

arbresdanslevent.jpg 

الريح اللِّي جا ما يْدِّينِي

*****

 

الرِّيح اللِّي جا

 

يصمّكْ وذني

بْصداعُو

يغمّضْ عِيني

بْعجاجُو

إيهُرْنِي

وِضحّكْنِي

الرِّيح اللِّي جا

مايْغرّقْنِي

ولا يْدِّينِي

الريح إلى جا

انْقاوْمُو

 بصبري

 بعقلي

 بتجاربي

يحاولْ

هْهْهْهْهْهْهْه

يا خُذْنِي

إيجُرْنِي

و مايْدِّينِي

شحال منهُمْ

نفْخُو الرِيح

واللاّ حاس بْراسُو

منفُوخْ

منَفّخْ

معفّرْ

مناخْرُوا مقَوْسة

معمْرة بالرِّيح

شحال منهم

فشُو الريح

واللاّ خاوي

عاش خاوي

بالخوا الخاوي

غيرْ تْفْشْ

تْ فْ شْشششْ

واللاّ مْفشّشْ

غير بالرِّيحْ

على سْبّا

 شحال منهم

لاحو الرِّيح

عاش تالفْ

ناسي راسو

و منْسِي

امْنعّسْ راسو

عاش مليوح

مجْلِي

ميّتْ

شحال منهم

عْطاه الرِّيح ضربة

ضرباتُو

 ضرباتْ عليه

و على نْمَرْتُو

الريح إلى جا

إيحاوْلْ إيلُوحْنِي

وسط عجاجُو

يدوّخنِي

فْ دَوّامْتُو

نلوح عليه نيابْ عقلِي

انْعَضُّو

انْمضغُو

 بسيف عقلي

و تفكيري

إيموتْ الريحْ

فْ بلاصتُو

يبْردْ

يتهدّن

انْطيّح عجاجو

نطفِي هراجُو

 يديرْ  بحسابِي

 يراري بِيّ

إيراقْصنِي

إيغَنِّي لي

و مايْدِّينِي

الريح اللِّي جا

والله…والله

ما يدِّينِي

ilham 27/08/2008

***

****

 

عطاتْنِي علاشْ ندورْ

 

بْلسانْها الماضي

جرحاتنِي

ضنّاتْنِي محكُورْ

عطِيتها…

ما خلِّيتلهاشْ

ما خلِّيتْشْ فيها

ساليتْ معاها
                                                      حديقة العبارات المغربية dans 7argou w't7argou 36_1_42
درْتْ فيها

دورة شيطانية

حتى واللاّ راسها كا يْدُور

خرجت سلاحها

36_1_19 dans 7argou w't7argou

دموعها

36_1_4

ما الدِّيتْهاشْ فيها

و عطِيتها فْ اللّوٌلْ التِيقارْ

جبْداتْنِي

وانا نعطيها علاش الدور

قطعت حسها

هاكْ…بلاكْ

36_1_42
الصاط…الفّاط

الرّاق…المّاقْ

أو وقفنا عل الطلاقْ

دارتْ فيّ

أو درت فيها

عطاتني و عطيتها

هي من هنا

وانا من لْهيكْ

هي فْ طريقْ

وانا فْ طريقْ

أنا بعدا راجْلْ

36_1_22

البنات علي كا الدّورْ

غير بْ إشارة منِّي

نطيّحْ الزرْزُورْ

من فوقْ الصورْ

كيّتْها هي مرا

تْمّا تبْقى

تخمر

تدْمر

شكون إي ساوْمها

مشاتْ

سلاتْ

ههههههههه

36_1_10

غ تولي فْ الزناقِي الدّورْ

قال سبحانو…عاشرهن بالمعروف

أنا اللي عليَ درتُو

كانت واكلة

شاربة

مستورة

36_1_13

جبْداتْني

دارْتْ فِيَّ

جابْتْها فْ راسْها

ما نفعها بخور

لا شوافة

ولا سحورْ

أنا راجل

بِخِيرْ

نْجِيبْها صغيرة

هاكْدا كا الدِّيرْ

وْ نولِّي….آحْ على قلبِي

هايْمْ

تالفْ

واخّا تشوفونِي شارفْ

نولِّي عليها كا نْدورْ

واخّا الدّورْ فِيَ

36_1_40

تاكلْنِي

ندوبْ

فْ غرامها نولِّي منشور

36_1_41 36_1_3136_1_936_1_8

ilham 14/03/2009

 

****

couchsol2ansefiguier1.jpg

فْ نهارْ جميل

 

شمسو ساطعة

تقلّبْ الجوْ

بديتْ انْقلّبْ

فْ ذاتِي

فْ قلْبِي

اللِّي قالْبْ كاسو

 انْقلّبْ على جنْبْ الرّاحة

 فْ قلبي الواقفْ 

انْتْقلّبْ يمينْ وْ شمالْ

 ك النهار المْشمّرْ

  السّاد عليه من الغربي

 اللي على سْبّا

  و هواهْ نار

 ك النار اللي فْ الجوفْ

اللِي ما برّدها بكى الأيام

  تكْدِي  فْ الوقت المزروبة

تكدي فْ الشبابْ

تكْدي فْ الصحة

تكدي فْ العمر

ت…ك

ت…ك

دِي

تِ.. كْ. تَ. .كْ

تِ.. كْ

تَ.. كْ

إلهام 30/06/2008

 

***

***

وَصَّلْتْ الكذّابْ حتى لْبابْ الدّار

كِ الأمانة

 

باللاّتِي هي أحسن

بالمْهَلْ

بالفنْ

حطِّيتُو سطلْ بلا تْقَرْقِيبْ

كْلِيتْ  دْماغُو

دَوَّخْتُو بْحلاوة الصَّحْ

رَطَّبْتُو

بَرَّدْتْ فيه الحَرْ

جمعْتْ مْعاه

هرّستْ لو نِيفُو

وَصَّلْتْ الكذّابْ حتى لْبابْ الدّار

عْيى ما يْفُوحْ

وِدوخْ

وِطيرْ من المْقلة

حتى طار الكذوبْ

وْتْقادى الجهد

طار الغشْ

 بْخْ

طار من بْلاصتُو

أو بانْ المعقول

 وْ الصّحْ

الخوا اللِّي عامر كذوب

بان الخْوا الخاوي

اللِّي الصّح فيه عيبْ

حشومة

ممنوع

 فيه زيزونْ

عبْد مْكَتّفْ

 لابْس كذْبة بيضة

***

ilham  06/09/2008

***

طيحة وحدة

 

***

 

سْدِّيتْ على همِّي

من لسان البركاكة

من ضحكة الحسّادة

ف مطمورة قلبي

دَوَّرْتُو بقْفَّالْ دموعي

شدِّيت ف الله

ورضى الوالدين

حتى شدَّاتْني  الفقصة

أو جرْجراتني

اتْعْدَّاتْ عليَّ

و على صحتِي

طَيْحاتْ يدِّي

 كتافي

 كلمتي

 عيني للأرض

طيحات بِيّ

 علي الضِّيمْ

   بمْقامي

طحتْ على عين  قفاتي

 عَمْيَة فْ عذابي

طيحة وحدة

بغيت نتْسنَّطْ لْعْظامي

ساعا شدُّوني

طيْحُوي

أو عَوْجُونِي

وسط الطّايْحين

هرسُوا حسايْرِي

والليتْ علْ الحسيرة

ساسني الهم

شَطّبْني العذاب

نْفَضْ ضحكتِي

 صحتي

بحال الحسيرة

****

 06/09/2008

***

ادخل سوق راسك

***

ادخل سوق راسك

أو الدِّيها في راسكْ

إلى دويتِي…

إي ظنُّوكْ حاس براسك

سير أوا هيا سير

اعطي  الراحة لْراسكْ

سير…سيرْ

أو هنِّي راسْكْ

لا تنصحهمْ

لا توَرِّيهُم

اللِّي في راسكْ

غادي طلعوا…

إيطلْعوا لك فوق راسك

أو تولِّي يا الفاهم

حاني راسكْ

لا تتعصّبْ

برد دمك أو راسك

سير…سير

قضي شي حاجة لْراسكْ

لا يْقولوا عليكْ

معفّرْ أو تنفخ راسك

سير…سير

ارتاح…

 أو حط راسك

سير…سير

ارتاح…

وْ تسنّطْ لْراسْكْ

أنا نْصَحْتكْ

وْ نت دبّرْ لْراسك

ما تلوم إلاّ راسكْ

إلهام  19/07/2008

****

الدنيا دايْرة ماهِي طايْرة

***

الدنيا دايْرة

ماهِي طايْرة

الوقت بفصولها دايْرة

أنا اللِّي طايرة

 من المقلة

 مع الطيور

نتْعانْد مع الطّايْرين

ولو طارت معزة

 بالخوا الخاوي

مورْ الزواق الطّايْرْ

حتى طار مُخِّي بالريح

….

الدنيا دايرة

ماهي طايرة

واللِّيتْ نفهم معناها

نفهم مغزاها

 أو هي طايرة

بعْدْما شَبْتْ

تْكمَّشْ  وجهي

أو ركَبْتْ العُكّازْ

دارت الدنيا

أو دوْراتْ ساعْتِي

طرتْ مع الوقت

 من بْلاصْتي

رجع فرخي اللِّي طار

مُخِّي اللِّي طارْ

والليتْ نفهم الدنيا الدايرة

نفهمها أو هي طايرة

شربتها فْ جغْمة الماء

حيتْ شربتْ عقلي

الدنيا دايرة ماهي طايرة

أنا اللِّي فْ دورة الدنيا

دايرة مع الريح

أو طايرة من الدنيا

***

 

انْفَخْ الريحْ غَضبانْ

صاطْ فِيَّ…

لاحْنِي

انْفَخْنِي

زادْنِي انْفاخْ على انْفَاخْ

الخل على الخميرة

stresstendue12.jpg

خوا غَضَبُو فِيَّ

لاحْ انْفاخُو عْليَّ

فَشْ قَلْبُو على ظهرِي

على حسابِي

واللِّيتْ مدْكُوكة

عامرة همْ

ماشِي نَفْخاتْ بْنادم الخاوِية

بنادم اللِّي حاسْ براسو

  اتزادْتْ فِيه ضلعَة

 نافْخة فيه الروحْ

ردَّاتُو بنادْمْ

أو نْسى راسو

تقطْعاتْ فِيَّ النَّفْسْ

ماشِي نَفْسْ 

اللِّي ماعنْدُو نفسْ

    يتعزَّا فْ حياتُو

اللِّي نفْسُو تحت صبَّاطُو

  لَمطيّح بْراسو

 

و اللاَّ المنفُوخْ

اللِّي ياكُلْ وما يْقَيَّسْ

أنا منفُوخة بالغْدايْدْ

تمنِّيتْ نكُونْ بحال الرِّيحْ

و انْفَشْ قلْبِي

و نخْوِي انْفاخِي

11619756361.jpg

انْولِّي خاوِية من همِّي

ماشِي بحالْ بنادم الخاوِي

اللِّي عقْلُو خاوِي

اللِّي مانفخ فيه لا ريحْ

ولا زمانْ

 الحالْ فُمُّو للغَرْبِي

اللِّي ساطْ ليه الريحْ

فْ راسو

فْ دماغُو

بغيت نخْوَى

انخلِّي غِيرْ طرفْ

   من النَّفْخة

انْعِيشْ بيه

 

أو راسِي مرفُوعْ

  يبْقى لي دماغِي

 أو ما يطيرْ لِي الفَرْخْ

  نحْضِي جنابِي

منْ نفخاتْ الزمانْ

من نفْخاتْ بنادم الخاوِية

من نفاخْ بنادم اللي ياكلْ بنادمْ

من بنادم اللِّي إيلوحْ نفاخُو على بنادْم

  يرْفضْ إيتنْفخْ بهمْ خوه بنادْمْ

بغِيتْ انفشْ قلِبي

 انْرد مجاجِي

 

 ترجعْ فيَّ النفسْ

اللِّي تْقْطعاتْ

باشْ ترجعْ فيَّ الرُّوحْ

انْهَوِّي عقْلِي

انْرَجْعُو لْ بلاصْتُو

 

نخْوِي دماغِي

باشْ يبْقى لِي دماغِي

إلهام31/05/2008

****

على ظهر الدّايزْ

***

اللِّي دازْ

 

انْدَوَّزْها عليه

انْدَوَّزْ بيه نهاري

انخرّجْ غضبِي

و همومي

على ظهرو

 ما دارْها

لا بيدِّيه

ولا برجْليه

غير دايْزْ

بحال دموعي

بحال عُمري

***

 إلهام25/09/2008

****

 

coucherdesoleil1024.jpg

****

فْ بحر الدنيا

رميتْ راسي

رميتْ دماغِي

حفِّيتْ عقلي

 أو عينِي

فْ بحر الدنيا

سبحتْ

تحت المَّاجْ العالية

y1potrqyaipps1tapvi5nl2udqpjg9awjwxttdeniewjgy2skqf4pmcovhpsb6sfi712taoeolcee.jpg

طلعْتْ فوقها

 صرخْتْ فرحانة

وقفتْ فوقْ مَاء الأيَّامْ

بالسَّعداتْ علِيَّ

حاسَّا بْراسي

شانْتَا بْ صَحْتِي

ماقادْنِي حدْ

فْ بحر الزمانْ

اللِّي عامر ألوانْ

اللِّي ماه  ترابْ

 هايْجْ

أمواجُو جبالْ

حوتُو رجالْ

فيهمْ اللِّي صارعْ المَّاجْ

أو مازالْ

فيهُمْ اللِّي عْيى

وْ غْراقْ

فوق بحر الدنيا غنِّيتْ

رقصتْ مع المَّاجُو

أو بْترابُو حنِّيتْ

حتى جا اليوم

اللِّي فيه رْشيتْ

غْدْراتْنِي الصحة

خانتْنِي

رماتْنِي

دارْتْها بِيَّ

قَهراتْنِي

لحتْ راسي

فْ بحر الزمان

وْحلْ راسي

جْبْتْها فيه

ماحضيتوشْ

ما الدِّيتْهاشْ فيه

ventfort4.jpg

بحر الزمان

جابْها لْ راسي فْ التْمامْ

 كنتْ حاسَّا بْ راسِي

طَيَّحْتْ  بيه

وْاللِّيتْ حاطَّاه 

علْ المخَدَّة

غرقتْ فْ بحر الهمومْ

واخَّا كانْعْرفْ نْعومْ

إلهام 02/06/2008

***

وَقْفَة الشّرْقي

****

وقَفْتْ

وقفة الشّرقِي

هو يدْفلْ بْ نارو

إيفشْ قلبُو

يخْوِيهْ

وانا ناري نعوم فيها

نتْمَرْمْدْ فْ جْمارْها

وقَفْتْ

بحال الشّرْقي

ريقي واقف

نفسي واقفة

بحال دموعي

واقفة نتْشْوى بعذابي

 كِ صمايْمْ الشّرْقِي

عوّالة على خزِيتْ

باغا نفَرْقْعْ الرمانة

عروقي يضربُوا فْ راسي

قلبي يضرب فْ وْذانِي

بغِيتْ نشرّقْ وْ نغَرّبْ

 نضربْ الطَّرْ

و نبَرّدْ الحرْ

 ندخل فالهضرة

و  نخرجْ فيها

قبلْ ما تخرجْ  فيَّ

و  علِيّ

تخرّجْ منِّي

و  فِيّ العجبْ

 عل الطريق

و تخَرّجْ عقْلِي

بغِيت نخرج فالهضرة

و انْخرّجْ الهدرة المْركْنَة

بلاما نوْزنها

ولا نحْسبْها

 نكَمّشْ

و نْشَيَّرْ

بلاما النَّيَّشْ

و انْلُوحْ

كيفْ ما لاحني الزمان

نفَرَّقْها علْ البَرْكَاكَة

نطفي نارهم

نبرّدْ حرْهُمْ

نغَذِّيهُمْ

انلُوحْها عل الحُسَّادْ

انْفَرَّحْهُمْ

نَطْلقْ وْجُوهْهمْ

انْصَمَّكْ بيها الكذّابة

إيفَصْلُوها

وِيْخيْطُوها بْشْهَوْتْهُم

  انْتَفْ غضبي من الجدرْ

اللِّي  امْغَبَّرْ لِي الجدْرْ

  انْصُوطْ بْناري فْ همِّي

انْشَتَّتْ ليه الشْقَفْ

 نرمي عْجاجي

بحال الشرقي

نعْمي بيه عِينينْ عْذابِي

 نبرّدْ غدايْدي

بحال الشرقي

اللِّي يْبْردْ

يْتْهدّنْ

يتْفَشْ…..شْشْشْ

شْشْشْ

يخوا  من النار

يرتاح

 و يرجع غَرْبي

***

06/09/2008إلهام

***

بالنسبة للناس

 

 خرجْتْ على راسي

خرجْتْ لِها

خرجو رجلِيّ الشْواري

بالنسبة للناس

خرجتْ من الجّنبْ

خرجُوا علِيّ أفكاري

و التفَلْسِيفْ

ما خرجتشْ بحال لْعْيالاتْ

 ولا لأمّي

حيت قرّرت

فكّرْتْ

زعمتْ…

نخرج السوق

من الإيطارْ

انْقلّبْ على راسي

خرجتْ

خرجا وحدة

هازّا راسي

 مناخرِي

 كتافي

بالكبدة قاصحة

و القلب حيْ

خرجت

من الهدرة الخاوية

  الهَمْزاتْ الحامضة

من قلّة الشِّي

 من القلوب

و دخلتْ فْ الفّامْ

إلهام 25/09/2008

*****

منْ عامْ نُوضُو تْرُقْدُو

كنت فايقة

 مع جْنابِي

 من الكْلبة

أو عايقة

مع الوقتْ…فاقت حياتِي

فيْقاتْ صداع ذاتِي

وْاللاّ سعْدي راقدْ

بحال الجملْ الراقد

خلِّيوْهْ راقدْ…

باشْ قلبي مايْنوض عليَّ

  23/07/2008إلهام

12 Réponses à “حديقة العبارات المغربية”

  1. laila dit :

    اشكرك من كل قلبي على كلماتك العدبة الرائعة التي تسهرين على تاليفها قد ساعدتني كلماتك في تاليف مسرحيات عديدة انا عمري 15سنة اضفت كلماتك في مسرحياتى جميعها اشكرك اشكرك اشكرك

  2. meriem dit :

    je m’appelle meriem sadike
    je suis tres contente d’ecrire mes mots pour toi
    ana khdit ga3 kalimatek ofare9eteha
    o ze3la fi masera7iyati koleha
    fi l 7a9i9a neti katiba rai3a
    merci beucoup …

  3. karima dit :

    wa3errrrrrrrrrrrrrrrrrrrrrrrr

  4. عاشق الثرات dit :

    الا كان كلمهم معسل وكلامك محسن
    حنا كلمتنا قدمكم متقدر تحسم
    بان الي جابني لعندكم بحر طويل ومفتن
    رميت راسي في مواجو نستنى اهلو وحبابو
    وملقيت راسي غير وانا بين لسانو
    يسحبلي منانة تخرز وعباس بدور في جنانو

    اسمحلي بهده الكلمات انا مهتم بالزجل الشعبي والثرات الاصيل الا مممكن يكون بينا صفحة مربوطة بالاهتمام انا ربطت لساني في بريدي الالكتورني ونستنى رباطك وخيلك بش نقلعو

  5. Lmcnassi dit :

    السلام عليكم .ما عندي ما نقول تبارك الله عليك . فكرتيني ب عبد الرحمان المجدوب . بون كونتينوياسيون

  6. Anonyme dit :

    kanhan2ak rah kanktab b7alk okantmena lik l2istimrariya

  7. نهال dit :

    شكرا بزاف على الجمل الرائعه بشكركو من كل قلبي يعطيكو العافيه والصحه
    تحياتي
    نهال

  8. Anonyme dit :

    شكرا

  9. hicham roudani dit :

    شكرا جزيلا على هذا الزجل الرائع

  10. Anonyme dit :

    ياسلام على لكلام

  11. Anonyme dit :

    el arbi de guercif: chkran 3la had lkalimat

  12. Anonyme dit :

    Ecrit intelligent. Je suis tombé par hasard sur ce site et vais continuer à le suivre !

    https://vacancesiledefrance.wordpress.com

Laisser un commentaire

 

cornillonchristophe |
Les Livres de Loïc ! |
UN PEU DE POESIE |
Unblog.fr | Créer un blog | Annuaire | Signaler un abus | Franck Bellucci
| Les maux du coeur
| Mes mots...